William Kemmler, lair ing tanggal 9 Mèi 1860 ing kutha Philadelphia, Pennsylvania, Amérika, dadi pawongan sing pisanan nglakoni paukuman mati nganggo kursi listrik. Paukuman iki dadi sejarah amarga sadurungé, metode sing lumaku yaiku paukuman gantung.
Nalika umur 28 taun, Kemmler sing buta huruf lan nduwé riwayat alkoholisme, naté njalari gègèr. Ing sawijining dina, Kemmler tukaran karo pacaré, Matilda "Tillie" Ziegler. Amarga emosi sing ora bisa dikendhalèkaké, Kemmler njupuk kampak lan matèni pacaré mau. Kemmler banjur ditangkep déning pihak sing wajib lan dipatrapi paukuman mati déning hakim. Sanajan nalika iku aturan sing lumaku kanggo èksekusi paukuman mati yaiku kanthi digantung, pengadilan mutusaké cara sing béda: kursi listrik. Prastawa iki ndadèkaké jeneng William Kemmler kacathet ing sejarah minangka wong pisanan sing ngalami èksekusi kanthi cara kasebut.
Paleksanané Paukuman Mati
Ing dina Slasa, 6 Agustus 1890, jam 6 ésuk, ing pakunjaran Auburn, New York, wis kacawisaké persiapan kanggo paleksanan èksekusi. Ing ruwangan èksekusi, wis sumadya sawatara pejabat hukum, wartawan, lan 15 dhokter sing siyaga. William Kemmler kanthi dikawal pimpinan èksekusi, Charles F. Durston, katon mlaku tenang nalika mlebu ruwangan, katon necis nganggo klambi sing resik.
Sadurungé paleksanan, ana adicara cekak sing dipimpin Durston kanggo ngenalaké William Kemmler. Kanthi tenang, Kemmler ngadeg lan wènèh kurmat marang para seksi. Sabanjuré, Durston njaluk ijin supaya panganggoné Kemmler dibukak lan dhèwèké dikon linggih ing kursi listrik. Wakil Sheriff sing aran Yoe Velling kajibah nalèni Kemmler ing kursi listrik nggunakaké sabuk kulit. Katon yèn Velling rada gugup, saéngga Kemmler kandha marang dhèwèké, "Sing tenang waé Yoe, luwih bécik sing kenceng anggonmu nalèni."
Sawisé rampung ditalèni, Kemmler dianggoni topéng. Davis, sang ahli listrik, wis siyap nyekeli sakelar. Durston banjur wènèh isyarat marang Davis kanthi tembung pisahan, "Good bye, William." "Good bye," wangsulané Kemmler kanthi tenang. Davis enggal narik tuas sakelar kanggo ngaliraké listrik 1300 Volt. Sanalika, awaké Kemmler njingkat lan kaku. Asap kemebul saka èlèktroda sing mbakar sabuk lulang mau. Dhokter sing ngawasi jam katon gumeter; lagi mlaku 17 detik, salah sijiné kandha, "Cukup!, dhèwèké wis mati... patèni sakelarè." Awaké Kemmler katon njengkerung lan gosong, nanging dumadakan dhadhané mlembung. Kemmler isih urip, ndadèkaké para dhokter lan seksi padha bingung. Banjur keprungu paréntah supaya sakelar diuripaké manèh. Davis kanthi gugup narik munggah-medhun sakelar sing njalari aliran listrik ora ajeg.
Sawisé 70 detik, aliran listrik dipatèni. Ndeleng paleksanan paukuman mati sing nganti ambal kaping pindho iku, salah sijining wartawan saka United Press (George G. Bain) nganti semaput, déné liyané padha mutah lan mlayu ora wani ndeleng jasadé Kemmler. Asil pamriksan tim dhokter nyatakaké yèn awaké Kemmler kebakar nganti garing, uteké gosong lan atos kaya watu, otot-ototé kaku, lan saperangan gegéré kobong.
Dina candhaké, prastawa mau dadi pawarta gedhé ing koran-koran sing ngabar-ngabaraké yèn paukuman marang William ngalami gagal saéngga Kemmler kaya disiksa. Tuwuh protès ing ngendi-endi sing njaluk supaya paukuman kursi listrik dibusak. Saking akèhé sing protès, layang kabar Buffalo Express ngramal yèn Kemmler dadi wong sing pisanan lan pungkasan sing nglakoni ukum pati nganggo kursi listrik. Nanging ramalan mau mlesèt, amarga 50 taun sawisé, luwih saka 1.000 wong uga nglakoni nasib sing padha.
Nasibé
Sabenéré, wong sing kuduné nglakoni paukuman mati ing kursi listrik dudu William Kemmler, nanging ana narapidana liya sing kasusé mèh padha. Nanging, nalika Gubernur David B. Hill nandhatangani undang-undang paukuman gantung dibusak lan diganti kursi listrik ing taun 1889, kursi listrik mau durung rampung digawé nalika titi wanci èksekusi narapidana liyané, saéngga ukumané diowahi dadi ukuman seumur urip.
Anané Persaingan
Kursi listrik iki lair amarga anané persaingan (kongkiran) bisnis ing antarané panemu listrik Thomas Alva Edison karo pesaingé, George Westinghouse. Nalika sidhang, Kemmler dibéla déning para pengacara sing dipandhégani Burke Cochran saka New York tanpa nampa bayaran. Para pembéla ngandhakaké yèn dhèwèké ora mentala yèn menungsa kudu mati dibakar. Nanging sanyatané, kabèh iku duwé agenda ndhelik: Westinghouse nyurung pambélaan iki supaya bisa mbuktèkaké yèn listrik AC (arus bolak-balik) miliké, sing saiki digunakaké kanggo kursi listrik, iku mbebayani, minangka upaya ngrusak reputasi sistem arus listrik darbèké Edison.
Posting Komentar