Bénten jaman, bénten kahanan. Punika kasunyatan ingkang lumampah ing jagad gesang masyarakat samangké. Salah satunggaling prekawis ingkang saged kita pirsani inggih punika dolanan tradisional ingkang sampun awis sanget kita sumerepi malih.
Laré-laré samangké sampun boten tépang kaliyan sawarninipun dolanan tradisional ingkang prasaja, malah langkung nggatosaken dolanan impor ingkang langkung mélek téknologi. Sanèsipun punika, sampun boten wonten malih para simbah ingkang sadéyan dolanan tradisional kanthi mlampah ing lurung-lurung kampung. Mbok bilih, sadéyan kados makaten sampun kaanggep boten njamani, malah asring dipunanggep boten nguntungaken kagem nyekapi kabetahan gesang ingkang tansaya awis.
Pancèn éman sanget. Kamangka, dolanan wujud punapa kémawon, senadyan namung prasaja, tetep saged damel remenipun manah laré-laré, sanèsipun dolanan modhèrn ingkang asring damel laré kirang sosialisasi.
Museum Dolanan Tradisional: Papan Nostalgia
Begjanipun, ing kitha Ngayogyakarta sampun wonten muséum dolanan tradisional ingkang mapan wonten ing Taman Budaya Yogyakarta, Jl. Sriwedari No. 1, utawi sisih lèripun Taman Pintar.
Tigetingipun mirah sanget, namung kalih éwu gangsal atus rupiyah kagem tiyang sepuh (wasa), lan gratis kagem laré-laré ingkang dèrèng umur gangsal welas taun. Boten wonten awonipun menawi panjenengan ngaturi laré-laré tindak dhateng muséum menika nalika mangsa liburan sekolah.
Sanèsipun nambah seserepan kagem laré babagan kakayaan budaya wujud dolanan tradisional, ugi ngiras pantes kagem nostalgia tiyang sepuh. Muséum menika dipunprakarsani déning séniman asal Bélgia ingkang asmanipun Rudy Corens. Waah... malah tiyang manca ingkang gumregah ngluri kabudayan kita, lha kok boten kita piyambak, utawi sakmboten-mbotenipun Pamarintah ingkang kawogan?
Sumangga kalajengaken maos seratan basa Jawi sanèsipun babagan: Prangko Indonesia Paling Larang Regané.
Posting Komentar